零六年版一百零八項

1. 我覺得有自信既野或者人好有吸引力，不過暫時見到好有自信既都係虛構(例如電影中既角色)，而非真人。
2. 其實我並唔係大家所講既咁認真。
3. 暫時最fd既應該係Neo，不過有時感覺好陌生，唔知點解。
4. 我覺得女人型係會比男人型更型。
5. 我會對有魅力或有任何吸引我既地方既人著迷，正確黎講應該叫做發姣。
6. 我覺得朋友之間係唔需要有客氣既存在，當然唔係話可以呼呼喝喝啦，但如果存在過份遷就就會異常奇怪，所以如果你感到我對你好客氣，話唔定我地重未熟絡。
7. 如果我要搵人同我癲，我第一個會搵Phybee。
8. 我係一個唔悶得既人。
9. 我鐘意同輝講比較感情上(哩個感情並不單指愛情)既野，因為咁多個朋友，佢係哩方面比到最好既反應我。
10. 我可以一個人去睇戲，我唔會覺得無聊或者甚麼甚麼的。
11. 我唔會去同好熟既fd拍拖，因為我覺得本身好熟既話，好難升華到另一個階段，會比朋友哩個框框住，而且我會覺得好冇神秘感，因為大家都清楚晒對方既野。
12. 我好憎人老屈我同食煙。
13. 我有時好憤世嫉俗。
14. 我唔gur/憎一個人都唔會係佢面前講佢既衰野。
15. 我好累既時候會對咩都提不起勁，冇心做野，甚至講野，不論果樣係咩野定係咩人。
16. 我覺得情侶之間襯唔襯哩個問題好無謂，我覺得情侶之間係愛唔愛而唔係襯唔襯，如果哩個問題能夠纏繞在愛河中既你或者阻礙你地既發展，咁你地應該唔夠愛甚至唔係愛對方。
17. 我好憎Geog，原因四成係葉生，六成係我點努力都係一樣，令我久而久之變左放棄，最後生恨。
18. 除左靚同型哩兩個元素，我覺得一個女性有女人味係會加分。
19. 係而家哩個階段，我唔覺大胸既女性吸引，我覺得合乎比例既身形(材)先至係最好睇。
20. 我覺得鋼條形係一個男性最perfect既身形(材)。
21. 對於自己瘦，有時會好唔滿意。
22. 曾經何時因為自己唔靚仔而煩惱，不過諗到哩樣野係天生就冇咩感覺。
23. 對於物質上既野，我會盡我既能力去解釋比人聽，但如果係感覺既野，就唔好問我點解啦。
24. 我五年中學生涯得極少時間係唔開心。
25. 我唔覺得gay或les有咩問題，我覺得歧視人地既性取向就等同於歧視人地矮、窮或者傷殘一樣，係非常之唔尊重同冇禮貌。
26. 雖然我未至於十分有錢既地步，但我既生活都算穩定。
27. 我覺得自己都算大膽。
28. 我覺得一生能得一知己，勝過千千萬萬個朋友。
29. 雖然我中學未拍過拖，但從身邊人既事積，我對愛情哩樣野都略知一二。
30. 我有時好易抆，但我覺得情況已有所改善。
31. 同女仔玩唔代表係溝女，唔好咁幼稚啦。
32. 我覺得打飛機或者其他性知識好平常，所以我唔怕去講。
33. 我慶幸自己能夠識到而家哩班朋友。
34. 我覺得自己既社交能力都算係咁。
35. 我對於自己沒有一技之長而遺憾。
36. 我不太介意人地點睇我，不過如果係性格上就會好留意。
37. 我認為Truth Or Dare主要係用黎爆人秘密同互爆秘密，佢或者能增進朋友們之間既感情，但亦都可以係一把破壞友誼既利器。
38. 我好享受睇電視、睇戲同聽歌。
39. 我覺得有時會同朋友之間有層無形既隔膜。
40. 我好鐘意台灣既霹靂布袋戲，因為一個小小既木偶竟然可以好似個人咁，，當然都係關個操偶師事，但睇佢真係比睇不少劇集有趣。
41. 我其實都幾易滿足。
42. 有一頭長長秀髮(記住係要秀，齋長係冇用)係會加分，當然唔代表短頭髮既女仔就唔靚，除左髮型，一個人靚唔靚都重有好多因素。
43. 我對於自己終於能夠整番個Green Day網而感到興奮同自豪。
44. 總括而言，我都幾安於現狀，只有小部份係唔滿意。
45. 我覺得一男一女熟唔代表佢地拍緊拖。
46. 我鐘意，甚至可以話愛Billie Joe。
47. 好多人都覺得佢靚既人，我好多時都唔知點解唔覺，例如周麗淇。
48. 我鐘意外國人既樣貌同身形多過亞洲人。
49. 麻煩分兩種，自己惹番黎或者人地帶比你既，但我覺得多數既麻煩都係自己惹番黎，所以多數既麻煩都係犯賤。
50. 我覺得自己理性多於感性。
51. 我唔介意同人有身體接觸，不論係異性定同性，對於玩時既接吻都冇所謂，因為只係玩，都唔係真，就算叫我同人做親暱動作我都唔會介意，不過如果對手係唔熟既人，我就會有所避忌。
52. 人人都有脆弱既時候，我都唔例外，其實我都幾需要安全感，我都想比人撐，我都想比人支持下。
53. 我覺得自己好謹慎小心。
54. 我接觸外國音樂為多，但我唔抗拒本地音樂，即係我唔會主動去搵黎聽，但如果遇到岩聽既我都會成日聽，甚至因而愛上。
55. 我覺得自己都算為得朋友。
56. 我係主動出擊既人，因為守株待兔係冇用，而且如果有一樣野係你鐘意既、想得到既，但連你自己都唔主動去努力爭取，咁我都唔知你可以點樣去得到果樣野啦。
57. 我對於神話非常感興趣，例如希臘神話。
58. 我覺得自己冇野吸引到人。
59. 我好少憎人憎到恨之入骨，老土講句，因為憎人好累。
60. 我覺得中性美真係好美，特別係男性，唔係話一個男人好女人形果隻，而係中庸之道，我都唔識點樣具體去講。
61. 我好憎，或者叫做驚，女人發姣，我都好頂唔順好可愛、好小鳥依人既女仔，重有就係「奪命追魂Call」，即係纏身啦。
62. 我覺得自己有時幾激進、幾衝動。
63. 我覺得大多數既「唔一齊唔緊要啦，最緊要佢開心」(即係放手呀)都係自欺欺人，或者你可以話我自私，佔有慾強。
64. 我覺得應該做或者我想做既野就會去做，出盡全力去做，當然唔係指殺人放火奸淫虜掠啦。
65. 我好少受外在環境影響，例如唔會因為果排係咩特別日子而唔開心，都可以叫做意志堅定。
66. 我個人好現實，我做事會望回報。
67. 我樂於並喜歡當聆聽者。
68. 我認自己八掛，但我覺得自己其實係好奇心旺盛，當我知道左一樣野既某一小部份，我就會去搵晒果樣野既全部。
69. 能夠舒舒服服，好好地咁訓一覺係一件好幸福既事。
70. 我其實幾易覺得一個人靚或型，例如電影中某個角色做左某樣野咁，我就會抱有好感，所以我覺得自己其實都幾花心。
71. 我認為我阿媽最叻係佢煮野食叻，佢係徐氏既御廚黎嫁。
72. 哩個世界可能有神，但我覺得未必只有一個神，亦未必一定係耶穌或其他宗教既神。
73. 我覺得聖經內一些規條過於嚴厲，亦都唔適合現今社會，所以我有時幾不滿天主教和基督教。
74. 我不屬於任何一個宗教。
75. 我覺得做女人真係好慘。
76. 我做人幾優柔寡斷，例如人地問我邊日去唔去做咩咁，我多數會答到時先，因為我可以諗好耐先決定去唔去，但有時我又可以好決斷咁去決定一樣野。
77. 我覺得做人好矛盾，或者應該講，每一個人都有兩面。
78. 我幾易心軟。
79. 成績唔代表一切，成績差唔代表佢就係廢物，唔代表佢人格差，哩樣亦係我憎葉生既原因之一。
80. 雖然有好多科將來都未必用得番出黎，但我覺得讀書係有佢既價值存在。
81. 我有時都幾想，甚至恨拍拖，但哩類念頭多數都係一瞬即逝，如果要講，我渴求友情多d。
82. 我好憎受人拘束，有時少許都唔得，換句話說，我需要極大既自由度。
83. 高、矮、肥或瘦都唔係一個罪。
84. 我對足球丁點兒興趣也沒有，尤其是當你試過在你深夜熟睡時，家中忽然有一大群波友因為一個入球而歡呼喝彩。
85. 我喜歡現在的英文名－Henry，我重申，改哩個名同踢足球果個亨利(Henry)沒有任何關係。
86. 我算係一個幾「紙上談兵」既人，即係如果隔住一面牆(ICQ/MSN)，我可以做到好多我平時應該做唔出或者唔敢講既野。
87. 我既煩惱多數來自友情。
88. 有時用文字表達情感時，我會忍唔住去用英文，可能係感覺上較婉轉掛。
89. 當我想同一個人最fd時，我會想對方都當我係最fd，有少少獨佔既意味。
90. 如果我界定左一個人係我既好朋友，係一個好熟絡既人，我就會好重視我同佢既友誼，但如果佢只係一個普通朋友，我就唔會去主動做d咩。
91. 我接受唔到虛偽既人。
92. 我有時好女人，係一件事上擔心好多野，考慮哩樣完考慮果樣，婆婆媽媽咁。
93. 我唔識安慰人，但我會盡力去安慰人。
94. 我會努力維繫我認為應該維繫既野，只有當我出盡法寶仍然冇起色，先至會完全放手。
95. 對於朋友，我唔會特別去取悅佢地，哩個可能係我潑人冷水既成因之一。
96. 我有時講野會衝口而出。
97. 我對於好多野都要分得清清楚楚。
98. 我鐘意水。
99. 我接受到人係有需要或適當時講粗口，但如果果個人係又講唔係又講，即係一句野入面，有一半以上都係佢既粗口形容詞(其實唔應該叫佢地做形容詞)，我會覺得好難聽。
100. 當我認為一件事仍有進步的空間，我會用盡一切辦法找尋並實行改善的方法。
101. 我對日本忍者有說不出的喜愛(講到好似有特殊癖好咁….)，而且對日本神說、傳說、鬼怪等道地文化頗有興趣，不過我不是崇洋(東洋)的人。
102. 好多明星、名人老左都重好有魅力，不過有時都需要有電腦特效同化妝師既配合。
103. 我愛幻想。(邪惡的同學們，不要只顧性幻想)
104. 仲間由紀惠係我少有好鐘意好鐘意既女星，即係會去追晒佢所有既產物(歌、影、視)，佢真係靚中帶有幾份型味。
105. 做人最緊要係言而有信，所以係你未有把握時，最好唔好亂下承諾。
106. 言語係出力少但殺傷力奇大的武器。
107. 我認為自己有些微既自閉傾向。
108. 我愛每一個閱畢我哩個零六年版既一百零八項既你地。