今次考試心態簡直既大起大跌，首先一起，哩次考試係我讀書生涯當中第一次會編時間表，然後又會跟足時間表黎溫，以地理為例，我真係好比心機溫，三個課題我溫左兩個課題，一路溫一路抄低d point，之後背左佢，係同我以前溫書好唔同，我覺得哩次我真真正正叫做努力溫書，睇番以前，其實完全唔叫盡力過，求求其其，以前，我剩係拎起本書黎睇，再背少少野，係同今次唔同，我覺得我真係有一團火呀!
去到中史，我係馬不停蹄咁溫，禮拜四晚開始溫，禮拜六由朝早溫到夜晚三點，禮拜日就由朝早十點半溫到夜晚一點，我以前心態係時間唔該快d過，就咁拎住本書睇睇睇，捱到夜晚十二點準時訓覺，但今次我係想時間過慢d，比多d時間我溫書，以前我點會為左溫書溫到三點? 打機就有份-.-
但唔知係我溫得太慢呀定腦部記憶體不足，咁樣溫法依然係溫唔晒，就連我已經tip左題去溫，都仍然溫唔切….(今次中史考制度史經濟交通康雍乾)，心情開始下降。
其實，中華五千年，我一個小小既中學生又點會記得晒? 唔好話五千年啦，一千年都成問題，以我一個小小學生凡人之軀又點同兩局對抗，我自問一直都奉公守法，最多係遲交功課，衝下紅燈咁，點解要咁樣對一個可憐既中學生，教統局呀考評局呀，放過我啦，剔除政治因素，歷史希望後世人唔好重蹈覆轍，唐代科舉缺點都有講啦，極力背誦只會令「試學者以帖字為通經，而不窮義旨」，只係一味識背識記，但根本唔明白內中意義，就算背左，轉過頭又點會記得，腦部長此落去只會做成永久性既傷害= =
好啦，終於到考試時間啦，收到卷果刻，真係崩潰，完全估唔到首領會咁出，點會估到張騫同法顯一齊，選士係唐明科舉比較? 首領此等深厚之思，豈是吾等如斯小輩所能猜度得到? 與其盡費心思埋首憤讀但無回報，不如早登極樂，回歸涅槃吧= = 我之前咁努力溫真係唔知為咩，我有意志力溫到最後一刻，但我個心負荷唔到咁大個刺激。
「以有崖隨無崖，胎矣!」
「以有限的生命來追求無限的知識是很危險的!」
「死讀書，讀死書，讀書死」
可惜我三樣都係，教育要我一味讀一味背，死讀死背，讀埋背埋d死既書，不懂變通，最後因讀書而死….縱觀人既一生，若果話訓覺佔左最多時間，咁讀書一定係第二多，幼稚園小學中學預科大學，出到黎社會又會咩培訓進修，讀博士，老來重要活到老學到老，一生就比讀書牽住鼻子黎走，其實，讀書或許只係為買個安心，等你考得唔好既時候，可以以「我已經盡左力」黎做藉口，減輕自己既罪惡感-.-
至將來，到教育有改變一刻，歷史書定必記載:「八九十年代開始之填鴨式教育尤如秦火(焚書坑儒)」!!!
最近的回應