Protected: 台灣之旅．禁忌篇

此文章受密碼保護。如要閱讀，請在下面輸入密碼。

Password:

台灣之旅．觀光篇

當地除左觀光景點同旅遊區外，街道上好少會見到人，不論早午晚，街上都鮮有人類既出現，因為佢地都以車或電單車代步，一到放工，就會見到馬路想有一堆堆既電單車，晚上重可能會見到飆車黨。

忠烈祠

我覺得果幾位阿兵哥好慘，每人每日就係咁日曬雨淋一個鐘，唔准郁，成個木頭咁企係到，連汗都要係人地幫佢抹，企入面果兩位陸軍已經算好，頂上有遮蓋，但門口果兩位海軍就慘啦，日曬雨淋都算，重要食埋塵，大熱天時著住哩套制服，AC？！ 小兒科啦；不過我地留意到，佢地真係好耐先眨一次眼，如果唔係見到佢地有呼吸，真係以為佢地係假人，厲害厲害。

故宮博物館
 
入面所有既展品都係真，因為係蔣介石係大陸到拎過黎，其實我覺得台灣既博物館去一次就夠，冇興趣既唔去都冇咩所謂，純粹係為去一去哩個舉動。

中正紀念堂




本來冇咩特別，但勝在導遊講得好，我地一致覺得佢既感覺好似陸sir，即係一派既講故佬，但佢的確有知識，而且講得好生動有趣，至少我都跟足全場聽咁耐，總之，見到佢就好似見到陸sir同我地講課外野咁。

離開中正紀念堂時，係附近草地發現一隻松鼠，本來重可以影多幾張，但點知有一個香港家庭走過，然後大叫幾聲，松鼠就極速消失了，香港人就係咁，見到新鮮事物都先大吵大叫，好似驚死人地唔知咁，只係差在未報警，結果？當然就係立即失去對方既蹤影。

似陸sir既導遊

野柳地質石園


入面既石真係幾特別幾得意，地面重幾似係電影同卡通入面睇到既月球表面，但好熱，悶熱到好想逃離現場，逃到有冷氣既地方，風景不錯，但如果天氣可以配合一下就更好啦。

女王石

鷹頭石

西門町　與　士林夜市

購物既地方，類似香港既旺角、女人街咁，間間既款式其實差唔多，都係類似既野，最重要係要講價，唔係自己蝕底，而講價最好既方法就係扮走，真係試過比一開始個價平一半，可想而知，個價係被人起到幾高，記住，一定要講價；另外，你會見到好多香港既有既牌子，可以唔駛點入去，價錢唔會比香港平好多，甚至更貴，而且又冇得講價既。

除此之外，我地重去過101大樓同搭捷運，但冇咩特別；書店街就唔建議大家去，間間都差唔多，去誠品書店其實已經夠，類似Page One，但又未去到咁高級，但睇落都好舒服，而且真係比香港既平，不過相對較舊既書可能都係得返一本，新書就有好多，所以可能會有少許殘破或損傷，我都買左一本《甲賀忍法帖》，封面重係天野喜孝畫！

台灣之旅．吃喝玩樂篇

甫落機第一站就係六褔村主題公園，即係玩機動遊戲，但好多都係令你覺得辛苦而唔係刺激緊張，值得推介既係佢地既激流，佢會先衝一條短，再衝一條長，前者令大家濕透，係濕．透；後者竟然令人有離心力，應該係因為佢夠高夠斜，令我諗起美國迪士尼一個機動遊戲，又係由天跌落地下之後濕身，正！ 其次係海盜船，有離心力之餘會覺得好舒服，應該飛得高過海洋公園果個；整體黎講，我係幾失望，入面既機動遊戲係令你辛苦多過刺激，三十六度轉到你想嘔，唔似AIA既G Force，轉完都唔會想嘔，同樣地，海洋公園既機動遊戲都唔會令人覺得好辛苦，而係令人覺得有離心力、緊張等等，海洋公園果然係香港人既驕傲！

九份

芋圓蕃薯圓係熱，另外加左冷落去，所以食落又凍又熱，感覺幾得意，圓係煙煙韌韌，而且真係食到蕃薯味，值得一試。

魚蛋就周圍都有得食，九份既魚蛋同香港唔同，食落唔會覺得彈牙，但都幾好食，湯重幾好飲，成條九份街都有唔少鋪頭賣，我地都係求其入一間。

炸花枝丸，我唔係咁鐘意花枝丸既味，不過其他人就覺得好食。

深坑豆腐街

豆腐雪糕，真係好食，一定要試，好似食極豆腐花咁，好好食，一定一定要食。

無論香豆腐定臭豆腐都冇豆腐味，甚至連臭豆腐都聞唔到臭味，香港而家既臭豆腐雖然冇以前既咁臭，但起碼未見到都先聞到臭味，但我完全聞唔到台灣臭豆腐既臭味，純粹食佢既醬汁同配料，不過花生加香菜可以一試，幾特別。

士林夜市

大餅包小餅，唔知係咪因為揀左花生既關係，有點甜，唔太好食，不知不覺中受到眾人既冷落。

七里香，即係雞屁股，其實完全食唔到蘇味，只係好似食緊一舊有肥膏既雞肉，而且出奇地好食，大家只要克服心理障礙，一大口食落去啦！！(我係完全不加思索放入口-.-) 不過據講如果係燒以外既食法，七里香就會帶有蘇味。

大腸包小腸，腸與腸之間重有台灣米，其實就好似香港既黏飯，黏住黏住咁，幾好食，不過要用點力先可以咬開，因為米係黏黏的，大腸就係韌皮。

生炒花枝，個人感覺冇咩特別。

藥燉排骨/十全排骨，即係肉骨茶，骨就冇咩味，但個湯幾好飲，雖然加左中藥，帶點苦味，但唔會好似飲中藥咁苦，唔錯唔錯。

紅油炒手，即係辣雲吞，但又好似唔係辣椒醬，而且唔係話好辣，起碼我都食到，可以一試。

鐵板燒，格局幾日本，分別係沙茶羊肉沙朗牛排同唔記得咩野，價錢相對其他小食貴少許，其他小食主要係五十台幣，但哩幾樣都要一百以上台幣，不過都值得比既，尤其是沙朗牛排，以三四十港紙黎講係唔錯，係香港食哩種格局既鐵板燒閒閒地都百幾二百港紙啦。

哩間豪大大雞排出名夠大塊，肯定大過你塊面，但其實冇咩特別，就好似食一塊特大既炸雞排，一個人肯定食唔晒，一定要同人分，另外雞皮成日脫離雞肉，即係食雞肉會冇咁油膩。

泡泡冰，食左幾隻味，包括冇雞蛋味既雞蛋牛奶同百香果，但我都係覺得抹香綠茶最好食，但食既時候記住要快，因為台灣既炎熱天氣好快融晒杯泡泡冰，又或者你可以拎定飲管，最後飲晒佢。

棺材板，即係多士入面夾有其他食物同汁料，佢既汁料有點似白汁，好食唔在講，可能因為多士夠厚，食落唔會覺得濕淋淋，一攤野咁。

華西街夜市

牛肉麵，麵同湯都好味，但牛肉就略嫌老左少許，好多地方都見到牛肉麵，或者其他地方既會冇咁老，由於係華西街停留既時間好短，食完牛肉麵都要走，冇時間去食同行。

另外，係其中一餐既午餐重食左割包，就好似北京填鴨咁，不過就係用包，唔係皮，同埋入面既肥豬肉，重有花生香菜同梅茶，我覺得好好食，唔駛驚肥膏，我兩次都整走肥肉先放落去，真係好食。

祝閣下 旅途愉快

現在的時間是上午四時四十五分，準備出發到機場，呆等到八時十五就會出發到台灣
祝我一路順風！

Doctor Who 4×10

密封的空間往往是劇本用來描寫人性醜惡的工具，這一集的Doctor Who不如以往一般正面，充斥著Torchwood的黑暗。

Doctor、Winfold Hobbes教授、他的助手Dee Dee Blasco、Jethro和他的父母、Sky Silvestry夫人、空姐駕駛員Joe、機修工Claude，一共十個人。

Doctor一直如英雄般的形象，深受大家的信任，在危機時拯救大家，但在這一集面對人性的脆弱和醜惡，也險遭人性所殺，本來Dee Dee跟Jethro都能保持清醒的頭腦，但勢孤力弱，就像一件食物，當人人都說它好吃，你總會想試一試，但當人人都說它難吃，就算它本身有多好吃，難免會起抗拒的心，Jethro在最後一刻更放棄堅持，一起合力將Doctor拋出車(?)外，幸好空姐發現真正的禍首，更犧牲自己，履行自己保護乘客的責任，但原來大家都不知道她的姓名，那種唏噓更為明顯。

教授代表腐敗的知識份子，自命不凡，認為自己學懂的知識就是一切，凡自己知識以外的就是空談，在一開始更滔滔不絕地說明藍寶石是甚麼，自己已經是第十四次來，這種人就好像是你看電影時(或之前)不斷地劇透，大家興致勃勃地去旅行去參觀時，一盆冷水倒下來，最令人找狂。 

Jethro的父親是大男人，無時無刻都在想像面子，以「不是懦夫」來作為扼殺另一人生存機會的藉口，我看不到勇氣，只看到愚蠢；他的母親就好像無知婦孺，遇到問題就不停大叫大叫，在事情過後說了一句：「I Said It Was Her」，但卻是鼓吹將Doctor拋出外面的其中一人，那這可以說是道歉嗎？

想不到在DW都能找到TW的那種心理壓力，這類劇情雖然十分常見，但這一集的確寫得很好，七位乘客和空姐的性格在短短約四十五分鐘刻劃出來，以Sky的不斷學習作為暗湧，以眾人合力將Dotcor拋出外面推上高潮，最後以空姐的犧牲和一片光芒下幕，留下一股壓力、黑暗予觀眾，Russell T Davies的確厲害。

工作

除了上班有錢收外，我一直也知道上學在各方面都比上班好，但這次親身體驗後，感覺更加強烈。

同事都很好，工作量不大，可以坐，可以偷懶，遲到沒人理，多勞多得，人工還算不錯，以暑期工來說真的是一份「荀工」，但我就是不喜歡上班，學Codey所說，重點在於「返」字上，很多時候都百般不願意上班，上班時又覺得時間很難過，其實我並不討厭這份工作，但每天都在重覆同樣的事情，數個月也還可以，但要一直做下去，嘩，我一定不能忍受，要找一份工作不易，但要找一份自己有興趣又可以滿足生活的工作更難。

其實我明白這些道理，真的明白，但奈何明白不代表會努力實行，人生最重要的兩個考試都完結了，自問未有盡人事，那唯有拼天命啦。

社會黑暗初體驗

今日是我完結第一份暑期工的日子，同時發生了一些小風波。

話說今日突然有兩位女同事被辭退，其實人手應該不夠，因為有好幾個人都會/已經走了，公司沒說任何原因，真的無故辭退，寧願賠七個工作天的薪金，也要人立即離開，令人很意外、很不解，她們工作能力一定沒有問題，也不是常常犯錯，我們懷疑是因為其中一位引起其他男同事的注意，其實也只是幾個吧，而另一個女同事應該是受到連累-.- 不過她們後方就正正是高層的座位，一舉一動都一目了然，自己又不懂收放，但我都十分同情她們的遭遇，她們是想繼續做下去，但卻無聲無息被趕走，還要四五點通知，然後要她們即刻走。

其實在網上看到其他人對這間公司的評價都是好壞參半，甚至走向兩極化，也聽說人事方面很複雜，想不到會向我們這些小職員下手，難道引起狂蜂浪蝶都是罪？ 工作方面一定沒有問題，也應該沒有得罪高層，除了上面提到的原因，也可能是因為已經過了高峰期，然後就「打完齋唔要和尚」，順帶一提，某男同事知道後，立即變得十分失望，聽說力追女同事的就是他，真悲哀。

女人，醜的，又會被人厭棄；美的，又會引來殺身之禍，女人真難做。

ps: 那位女同事不是我杯茶，我還是不明白為何大家都力追她。